Tanzania : Perezida Magufuri yasabye abaturage be gusenga bashima imana kuko Covid-19 yagabanutse

Kuva uyu munsi Abanyatanzania batangiye igihe cy’iminsi itatu yo gushimira Imana nyuma yaho Perezida John Magufuli atangarije ko ubwandu bwa Covid-19 bwagabanutse mu gihugu.

Perezida Magufuli yashishikarije abaturage gukoresha iki gihe bagashimira Imana kubera ukuntu yarwanyije iki cyorezo, aho avuga ko ibi ari ingenzi mu gufasha Tanzania kwirinda coronavirus.

Hashize hafi ibyumweru bitatu iki gihugu gihagaritse gutangaza amakuru mashya ya buri munsi ajyanye n’umubare w’abanduye covid-19, ibi bikaba byaratumye hibazwa byinshi ku ishusho nyakuri y’uko iki cyorezo gihagaze muri iki gihugu.

Iyi ni indi nshuro Bwana Magufuli asabye abaturage ba Tanzania gusenga iminsi itatu, uhereye uyu munsi ku wa gatanu kugeza ku cyumweru tariki ya 24Gicurasi 2020.
Inkuru ya BBC ikaba ivuga ko aya masengesho ngo azaba ari ayo gushima Imana kubera igabanuka ry’umubare w’abanduye Covid-19 mu gihugu.

Uretse ibi kandi Abayobozi b’inzego z’ibanze, nk’umukuru w’akerere k’umujyi wa Dar es Salaam bakaba banasabye abantu ko ku cyumweru bazitabira igikorwa cyo kwishimira irangira rya coronavirus.

Iyo gahunda yo guhura igaragara nk’irenga ku mabwiriza y’ishami ry’umuryango w’abibumbye ryita ku buzima (OMS/WHO) abuza kwegerana mu rwego rwo kwirinda kwiyongera k’ubwandu bwa coronavirus.

Muri iki cyumweru, leta ya Tanzania yatangaje ko izongera gufungura amashuri amwe n’amwe ndetse ko n’ibikorwa by’imikino bigiye gusubukurwa.

Ndetse Leta ya Tanzania yanatangaje ko guhera mu cyumweru gitaha izemerera abagenzi baturutse mu mahanga kwinjira mu gihugu gusa ibi bikaba bitavugwaho rumwe n’abatavuga rumwe na leta ya Tanzaniye aho Depite Zitto Kabwe yanenze izi ngamba za leta akavuga ko atari ukuri ko imibare ya Covid-19 iri kugabanuka mu gihugu.

Mu ntangiriro y’uku kwezi kwa gatanu, Leta Zunze Ubumwe z’Amerika zatangaje ko leta ya Tanzania ahanini itangaza imibare iri hasi cyane y’ubwandu bwa coronavirus.
Kugeza ubu Hashize hafi ibyumweru bitatu nukuvuga iminsi irenga 20 abategetsi ba Tanzania badatangaza imibare mishya y’ubwandu bwa covid-19.

Twabibutsa kandi ko leta ya Tanzaniya iheruka gufata andi masengesho y’iminsi itatu yabaye mu minsi yashize akaba yari ayo gusaba Imana ngo irengere kandi itabare igihugu maze ibakize icyorezo cya Covid-19, amasengesho yaranzwe no gusenga no kwiyiriza ubusa ku batuye mu gihugu bose.

Tanga igitekerezo