RGB yiyemeje gushaka igisubizo ku bibazo bimaze igihe muri ADEPR

Umukuru w’Urwego rw’Igihugu rushinzwe imiyoborere, RGB, Dr Usta Kaitesi, yatangaje ko ibibazo bimaze igihe bivugwa mu itorero rya ADEPR mu gihe cya vuba bizaba byabonewe umuti.

Hashize iminsi havugwa ibibazo by’ingutu muri ADEPR birimo amakimbirane hagati ya Biro Nyobozi n’Inama y’Ubuyobozi, guheza no kwirukana bamwe, gusesagura umutungo n’ibindi bishingiye ahanini ku miyoborere y’iri torero, ku buryo hari abayoboke baryo bakomeje kwibaza amaherezo yabyo n’uzabikemura.

Mu mezi 10 ashize ADEPR yakunze kuvugwamo ibibazo bitandukanye birimo gufungwa k’Umuvugizi wayo wungirije, Rev Karangwa John, ushinjwa gukoresha impapuro mpimbano [aherutse kugirwa umwere], kwirukanwa kw’abakozi n’abapasiteri n’ibindi.

Abakurikiranira hafi ubuzima bwa ADEPR na bamwe mu bayoboke bayo, bahuriza ibibazo by’iri torero mu byo bita ‘imiyoborere mibi’ ya Komite Nyobozi, irangajwe imbere na Rev Karuranga Ephrem.

Muri Gicurasi uyu mwaka, Biro Nyobozi ya ADEPR yashinjwe kugabanya imishahara y’abakozi b’itorero binyuranye n’amategeko, ariko yo ikavuga ko mu bihe bidasanzwe ifite ububasha bwo gufata ibyemezo byihutirwa.

Ibi bisanga ibindi bibazo birimo guheza bamwe no gutonesha abandi. Kuri iyi ngingo hagarukwa ku bagenzuzi babiri baherutse kwirukanwa hagasigara umwe kandi bose barakoze ubugenzuzi bwashingiweho birukanwa.

Hari kandi kuba hari abafunzwe nyuma bakagirwa abere, ariko bakirukanwa ku mirimo ndetse bagahezwa mu buzima bw’itorero, mu gihe Umuvugizi wungirije wa ADEPR, Rev Karangwa yafunzwe amezi umunani yafungurwa agasubizwa ku mirimo ndetse hakaba amakuru y’uko azahabwa imishahara y’ayo mezi yose.

Umukuru w’Urwego rw’Igihugu rw’Imiyoborere, RGB, Usta Kaitesi, abinyujije ku rukuta rwe rwa Twitter, yavuze ko ibibazo biri muri iri torero biri hafi kubonerwa umuti. Yasubizaga umwe mu bakoresha uru rubuga wamubazaga amaherezo y’ibibazo biri muri ADEPR.

Ati “RGB mu nshingano ifite ku miryango ishingiye ku myemerere irakurikirana kandi humura umuti uzaboneka bidatinze.”

Usibye ubwumvikane buke mu buyobozi, muri iri torero kandi havugwamo ibibazo by’imicungire mibi y’umutungo, aho ubugenzuzi ku mikoreshereze y’umutungo ku cyicaro cy’itorero ADEPR, bugaragaza ko hagati ya tariki 1 Mutarama kugeza tariki 30 Nzeri 2019, habayeho gutanga amasoko binyuranyije n’amategeko, umutungo w’itorero ucunzwe nabi, gusesagura umutungo n’ibindi.

Bimwe mu byagaragaye mu igenzura ni ibibazo n’amayobera ku cyuma gisya amabuye akavamo umucanga kiri mu Karere ka Bugesera (Crusher), aho cyari kimaze amezi 11 gikora ariko nta faranga na rimwe ryinjira mu isanduku y’itorero kandi cyaragombaga kwishyurwa miliyoni 9 Frw buri kwezi.

Ikibazo cy’Impamyabumenyi zigenwa n’itegeko ku bayobozi ba ADEPR ni ikindi mu bikomeje kwibazwaho. Mu mpera z’umwaka ushize, Umuvugizi Wungirije wa ADEPR, Rev. Karangwa John, yatawe muri yombi n’Urwego rw’Igihugu rw’Ubugenzacyaha (RIB) akurikiranwaho gukoresha inyandiko mpimbano.

Rev. Karangwa yatawe muri yombi mu Ukwakira 2019. Yashinjwaga icyaha cyo gukoresha inyandiko mpimbano, igihe yiyamamarizaga umwanya w’Umuvugizi wungirije muri ADEPR, kuko byasabaga ko uwiyamamariza uwo mwanya agomba kuba afite impamyabumenyi y’icyiciro cya kabiri cya kaminuza, Bachelor’s.

Ibi kandi bisanga ibindi bibazo birimo kwirukana abapasiteri mu buryo butavugwaho rumwe aho nka Pasiteri Zigirinshuti Michel yirukanywe mu gihe abandi barimo na Habyarimana Désiré ubarizwa muri Paruwasi yo mu Gatenga, bandikiwe amabaruwa yo kugawa kubera amakosa bakoze.

Pasiteri Zigirinshuti bivugwa ko yahowe amagambo y’inyigisho n’ubuhanuzi amaze iminsi atangaza, ahanini afitanye isano n’indwara z’ibyorezo ndetse na Pasiteri Habyarimana Désiré wandikiwe yihanangirizwa kuko yasezeranyije umukobwa wo muri ADEPR binyuranye n’amategeko.

Kurikirana video ivuga ko bomboribombori zivugwa muri ADEPR :

Tanga igitekerezo