Imbamutima z’abakunzi ba Niyo Bosco na Aline Gahongayire nyuma yo gukorana indirimbo

Niyo Bosco na Aline Gahongayire bakoze ku mitima ya benshi nyuma y’indirimbo bahuriyemo isubizamo benshi intege mu bugingo bakongera kugira ibyingiro by’uko ibakunda kandi ejo ari heza.

Ni indirimbo aba bombi batangiye gupanga ku munsi wa mbere ubwo Aline Gahongayire yahuraga Niyokwizerwa Bosco [Niyo Bosco] wari utarinjira mu muziki ariko afite impano ihambaye mu kuririmba no gucuranga.

Inzozi zabaye impamo mu ntangiriro z’uyu mwaka, aba bahanzi bombi muri Mutarama batangira kwandika iyi ndirimbo yanamaze kujya hanze ifite amajwi n’amashusho.

Aganira n’itangazamakuru, Aline Gahongayire yatangaje ko ari indirimbo isobanuye byinshi kuri we no kuri Niyo Bosco.

Ati “Ni indirimbo ifite ikintu ivuze kuri twe. Tumaze umwaka urenga duhuye tunemeranya uyu mushinga wayo. Ni umwana w’umuhanga cyane ndetse ikintu gikomeye ivuze ni uko kuba umuntu afite ubumuga bitavuze ko adashoboye.”

Akomeza avuga ko ari indirimbo yo gusubizamo abantu ibyiringiro babwirwa ko hari izindi mbaraga z’Umukiza Yesu, zituma umuntu ashobora kubaho niyo ibintu byaba biri kugenda nabi ariko Imana ikamurengera.

Ati “Ni indirimbo yo gusubizamo abantu ibyiringiro tubabwira ko Imana ibakunda kandi ariyo ihora ituberera umunsi ku wundi no kubabwira ko hari izindi mbaraga z’Imana zihora zituri hafi.”

Iyi ndirimbo yanditswe na Aline Gahongayire na Niyo Bosco, nyuma yaho bose bahurije ku gitekerezo cyo guhumuriza abantu.

Ku bitekerezo byinshi byatanzwe kuri iyi ndirimbo imaze iminsi ibiri igiye hanze, byose byavugaga ko ifite uburyohe, ubutumwa ndetse ikaba ikora ku mitima y’abihebye babuze ibyiringiro.

Nk’uwitwa James Mugambe byamurenze aravuga ati “Ndi kurira !”

Batamuriza Yvonne yanditse ati “Ngize amarangamutima. Mwakoze indirimbo nziza, Imana ibahe umugisha kandi igume kubagura mu mwuka ibahe imbaraga z’umubiri ni z’umwuka ndabakunda mwese.”

Aline Gahongayire na Niyo Bosco bafitanye ubuhamya bukomeye !

Muri Kanama 2019 ni bwo bwa mbere Niyo Bosco yahuye na Gahongayire wari umaze iminsi yifuza ko bazabonana.

Icyo gihe mu kiganiro Niyo Bosco yagiranye na Murindahabi Irene wamuhuje n’uyu muhanzikazi yagize ati “Nyine igihe nari ndi gukorana ikiganiro nawe wambajije abahanzi nshaka guhura na bo, rero na Aline Gahongayire ari mu bahanzi navuze, kandi ari mu bo mfatiraho urugero. Kuba duhuye ibyo byose nahoraga mwumvaho bigiye kwikuba kuko nyuma y’ubu hari buze ibikurikiraho.”

Aline Gahongayire we yavugaga ko agiye kumuha ubufasha bw’uburyo bwose ku buryo impano itazigera ipfa ubusa, ndetse yanemezaga ko bishoboka Niyo Bosco utari wakagize indirimbo n’imwe, bakorana ariwe muhanzi baririmbanye ndetse no ku ndirimbo ye ya mbere.

Ati “Ndi mu bantu bagiye kumuha ubufasha. Afite impano ikomeye yaba mu kuririmba cyangwa gucuranga. Icyiza mukundiye afite umunezero mwinshi cyane niyo mpamvu n’abandi bafite ubumuga bwo kutabona nababwira ko akwiriye kubabera urugero. Byakabaye byiza ari njye muhanzi dukoranye indirimbo wa mbere.”

Niyo Bosco wakoranye na Aline Gahongayire yavutse mu 2000 mu Karere ka Nyamasheke ariko kuri ubu atuye mu Mujyi wa Kigali aho yimukiye n’umuryango we urimo abana umunani mu 2006.

Avuga ko kutabona yabitewe n’indwara ya Malariya yarwaye afite imyaka ibiri bikarangira imusigiye ubumuga. Kenshi iyo uganira n’uyu musore akubwira ko adafite amakuru menshi ku buzima bwe kuko byinshi mu byo avuga yabibwiwe n’ababyeyi be.

Uyu musore ukiri muto avuga ko yagize amahirwe yo kwiga kugeza mu cyiciro rusange, nyuma yo kurangiza umwaka wa gatatu w’amashuri yisumbuye mu 2019 yahise yifuza gukora umuziki ndetse anawiga.

Amaze gukora indirimbo zirimo ‘Ubigenza ute ?’, ‘Imbabazi’, ‘Seka’, ‘Uzabe intwari’, ‘Ibanga’, ‘Ubumuntu’ n’iyo yahuriyemo na Gahongayire.

Tanga igitekerezo