Karasira uri mu bashyize Bibiliya Ntagatifu mu Kinyarwanda yitabye Imana

Karasira Juvenal uri mu bahinduye Bibiliya Ntagatifu mu Kinyarwanda, yashyinguwe kuri uyu wa Kabiri nyuma y’aho yitabye Imana ku wa Gatanu w’icyumweru gishize azize uburwayi.

Uyu musaza yitabye Imana afite imyaka 72 y’amavuko. Umuhungu we Basile Umuhire, yabwiye IGIHE ko se “Yitabye Imana ku wa gatanu w’icyumweru gishize, yari amaze igihe kinini arwaye. Uyu munsi nibwo yashyinguwe.”

Karasira yari mu itsinda ryamaze imyaka itandatu mu murimo utoroshye wo guhindura Bibiliya Ntagatifu mu Kinyarwanda.

Umushinga wo gushyira mu Kinyarwanda Bibiliya wari urimo abantu benshi bari mu byiciro bine, barimo abasobanura bwa mbere, bagaha icyiciro cya kabiri kigenzura ibyo bakora, bigakomeza byagera ku cyiciro cya kane bose bagahura.

Michael Gasare wakoranye na Karasira mu bijyanye no gushyira mu Kinyarwanda Bibiliya, yabwiye IGIHE ati “Icyiciro cya mbere nicyo kiba kirimo abahanga benshi, nibo bakora Bibiliya. Nicyo cyiciro Karasira yarimo rero. Muzi kuva mu 2008, bari bararangije imishinga ibiri ya bibiliya, iya mbere yari iya Bibiliya Ntagatifu indi ari Bibiliya Ijambo ry’Imana”.

Yavuze ko nyuma bakoranye ku yindi mishinga harimo nka Bibiliya Ijambo ry’Imana ifite Icyongereza n’Ikinyarwanda, “turangije twakoze indi yitwa Bibiliya y’Urubyiruko. Aho hose twagiye dukorana. Yari umugabo w’umuhanga.”

Gasare yavuze ko Karasira yigeze kumubwira ko ubwo bajyaga gushyira Bibiliya Ntagatifu mu Kinyarwanda yagiye mu Butalitani kwihugura uko bikorwa amarayo amezi abiri.

Undi wakoranye na Karasira, yatangarije IGIHE ko yigeze kumubwira ko ubwo bashyiraga Bibiliya Ntagatifu mu Kinyarwanda, amagambo yose babanzaga kuyandika ku mpapuro n’ikaramu kugira ngo babone kuyashyira mu Kinyarwanda.

Bivugwa ko ariwe wahimbye amwe mu magambo y’Ikinyarwanda yanditse mu bitabo by’ibisigo n’ubuhanga birimo Mwene Siraki, Indirimbo ihebuje, Umubwiriza, Imigani n’ibindi.

Ngo yari umusaza w’umuhanga utuje kandi uvuga make akaba inararibonye mu ihinduranyandiko cyane cyane iza Kiliziya.

Gasare yavuze ko iyo Bibiliya iri guhindurwa mu rurimi runaka, abari kubikora bagabana inshingano, hakaba abakora amagambo arebana n’ibihe, ajyanye n’imibare, amazina y’abantu nyuma bikarangira bose bafite itonde ry’amagambo.

Muri iki gihe hifashishwa ikoranabuhanga rishobora gufata bibiliya yose rikayigira amagambo gusa, hanyuma agatandukanywa mu byiciro byayo nyuma.

Gasare ati “Ndahamya ko Karasira yari umuyobozi w’itsinda kuko yari umuhanga”.

Umushinga wo gushyira Bibiliya Ntagatifu mu Kinyarwanda watangiye mu 1984 urangira mu 1990.

Karasira asize umugore n’abana umunani n’abuzukuru 13.

Tanga igitekerezo