Itorero Inkuru Nziza rigiye kubaka urusengero rwa miliyari 4Frw - Amafoto

Ubuyobozi bw’Ishyirahamwe ry’Amatorero y’Inkuru Nziza mu Rwanda, butangaza ko ahari icyicaro cy’iri torero hagiye kubakwa urusengero ruzatwara akayabo k’agera muri miyari enye z’amafaranga y’u Rwanda [4 000 000 000Frw].

Icyicaro Gikuru cy’Itorero Inkuru Nziza giherereye mu Murenge wa Nyarugenge, Akarere ka Nyarugenge mu Mujyi wa Kigali, ni hamwe mu hafungiwe kutuzuza ibiteganywa n’amabwiriza yo muri 2018, agenga ahantu hateranira abantu benshi yatanzwe n’Urwego rw’Igihugu rw’Imiyoborere, RGB.

Muri rusange iri torero ryari rifite insengero zisaga 100 zari zarafunzwe kubera kutuzuza ibisabwa aho kuri ubu hasigaye izigera kuri 40 gusa kandi nazo hari icyizere ko zizafungurwa.

Muri gahunda y’imyaka itanu ya komite nyobozi y’iri torero harimo gukomeza gusigasira ibikorwa itorero ryari rimaze kugeraho mu bihe bishize, harimo kandi gukomeza kuvugurura insengero zafungiwe kutubahiriza amabwiriza ndetse no kubaka insengero nshya.

Umuvugizi w’Itorero Inkuru Nziza mu Rwanda, Pasiteri Ngendahayo Juvenal yavuze ko mu nsengero nshya zizubakwa harimo ahari icyicaro gikuru hakubakwa inyubako ijyanye n’igishushanyo mbonera cy’Umujyi wa Kigali.

Igishushanyo mbonera kigaragaza ko nibura iyi nyubako izatwara hafi miliyari 4Frw, izaba igizwe n’Urusengero runini rufite parikingi igezweho yo hasi, ibiro bikoreramo abakozi b’itorero, amacumbi yo hejuru [Apartments] azajya acumbikira abashyitsi b’itorero n’abandi bantu babyifuza.

Ubuyobozi bw’iri torero butangaza ko ibijyanye no gushakisha amafaranga yo kubaka uru rusengero bizakorwa n’abarigize aribo abakristo, ubuyobozi bwaryo ndetse n’abandi bantu bagiriye ibihe byiza muri iri torero bifuza gutanga umusanzu wabo mu kuryubaka.

Mu kiganiro yagiranye na UKWEZI, Pasiteri Ngendahayo yavuze ko ibijyanye n’ibyangombwa byo kubaka byamaze kuboneka igisigaye ari ukureba uko batangira cyane ko na bamwe mu baterankunga bari bamaze kubavugisha.

Yakomeje agira ati “Twatekerezaga gutangira muri uyu mwaka kuko hari n’ibyo twari twatangiye kugeraho ariko nawe urabona iki cyorezo cyateye kitaduteguje hari ibyo cyangije kugeza ubu ibiganiro n’abazadufasha turi gushaka uko byakongera gusubukurwa urabona indege ntabwo ziri kugenda.”

“Icyo kituraje ishinga tugishyize imbere kurusha ibindi cyane ko n’abantu batubaza bati tuzongera gusenga ryari ? Hari abakristo benshi batari nab’Itorero Inkuru Nziza n’abandi bose bagiriye umugisha hano, ubwo rero ntabwo tuzahagarika gahunda y’amateraniro ya saa sita n’ubwo byabaye bisubitswe ngo tubanze twubake ariko bizasubukurwa.”

Avuga ko hari komisiyo yashyizweho igamije gukurikirana ibijyanye n’iyi nyubako ari nayo ifite igishushanyo mbonera mu nshingano kandi bizeye ko ibikorwa byo kubaka bizatangira vuba nanone hagendewe ku mabwiriza agamije kwirinda COVID19.

Pasiteri Ngendahayo yasobanuye ko bateganyaga ko nibura uyu mwaka ibikorwa byo kubaka biba bitangiye noneho bikarangira muri Kamena 2021.
Itorero Inkuru Nziza mu Rwanda ryatangiye gukorera mu Rwanda mu 1961 ariko riza kwemererwa gukorera mu gihugu mu 1962, aho ryagiye rikora ibikorwa binyuranye mu Rwanda.

Raporo iheruka y’Itorero Inkuru Nziza mu Rwanda igaragaza ko rifite abakristo basaga gato ibihumbi 36, babarizwa mu nsengero [Paruwasi], zigera ku 195 ziri hirya no hino mu gihugu.

Iri torero rifite ibitaro biri i Gikondo, rikagira n’ishami. Iri torero rifite ibigo by’amashuri ari ayisumbuye n’abanza, aho banafite ikigo cy’amahugurwa kiri i Gihogwe mu karere ka Gasabo, Umujyi wa Kigali.

Umuvugizi w’Itorero Inkuru Nziza mu Rwanda, Pasiteri Ngendahayo Juvenal

Tanga igitekerezo