Ikihishe inyuma y’urugendo rwa Gaby Kamanzi uri kubarizwa muri Côte d’Ivoire

Umuramyi Gaby Irene Kamanzi uri mu bakunzwe cyane mu Rwanda no mu karere ari kubarizwa mu gihugu cya Côte d’Ivoire. Yatangarije itangazamakuru ko yagezeyo amahoro, akaba yiteguye gukora ibyo yatumiwemo muri iki gihugu anabahamagarira abakunzi be kuzabana nawe.

Kuwa Kabiri tariki ya 09/02/2021 ni bwo Gaby Kamanzi yafashe rutemikirere imuvanye i Kigali yerekeje muri Cote d’Ivoire ku butumire bwa Televiziyo ya Gikristo ikomeye muri iki gihugu, yitwa LMTV. Yagezeyo ku mugoroba wo kuri uyu wa Kabiri. Gaby Kamanzi yabwiye InyaRwanda.com ko yagezeyo amahoro, ati "Nahageze amahoro". Avuga kuri Televiziyo yamutumiye, yagize ati "LMTV (yantumiye) ni Christian TV channel igaragara kuri Canal+. Numéro yayo ni 192".

Yavuze ko azagaragara mu biganiro bitandukanye by’iyi Televiziyo, ati "Nzaba umutumirwa mu biganiro bitandukanye by’umwihariko icyitwa ’ADORONS DIEU’, ni Worship live muri 20 cyangwa 30min. Nzaba ndi kumwe n’aba backup singers, n’abacuranzi. Ikindi kigaro ni ’PLACE DE CHOIX’, ni ikiganiro cy’umuhanzi akavuga ubuzima bwe noneho akanaririmba. Nzaririmba indirimbo zanjye bwite. Ni ikiganiro cy’urugendo rw’umuhanzi mbese urugendo rwa muzika".

Yunzemo ati "Ikindi kiganiro ni ’WAKE UP’ aho nzaba ndi umutumirwa mu bandi, nzagira igihe cyo kuririmba indirimbo nke...". Usibye ibi biganiro azagaragaramo nk’umutumirwa, azanitabira amateraniro azaba mu minsi itandukanye muri uku kwezi kwa Gashyantare ariko nayo agatambuka kuri Televiziyo. Ati "Indi gahunda nzagaragaramo ni Culte bajya bakora kuri TV. 12 Février : WAKE UP, 13 Février : CULTE Live, 15 Février : ADORONS DIEU, 16 Février : PLACE DE CHOIX".

Gaby Kamanzi yerekeje Côte d’Ivoire

Gaby Kamanzi werekeje muri Cote d’Ivoire nyuma y’iminsi micye ashyize hanze indirimbo nshya yise ’Emmanuel’, arakunzwe cyane mu muziki wa Gospel yatangiye afite imyaka 8 y’amavuko aho yahoraga areba Televiziyo, agahita afata mu mutwe indirimbo yabaga yarebye. Kugeza ubu amaze gukora indirimbo zinyuranye harimo izamenyekanye by’ikirenga nka ’Amahoro’ yamukinguriye umuryango w’ubwamamare, ’Wowe’, ’Ungirira neza’, ’Neema ya Goligota’, ’Arankunda’, n’izindi nyinshi. Ni we muhanzi nyarwanda wa Gospel ufite agahigo ko kuririmba mu bihugu byinshi ku Isi.

Tanga igitekerezo