Coronavirus : Mgr Rukamba yatanze icyifuzo cy’uko hajya hakoreshwa ikiyiko mu guhazwa, abajya mu misa bakandikwa

Umushumba wa Diyosezi ya Butare, Musenyeri Philippe Rukamba, yandikiye abapadiri n’abakirisitu ayoboye abagaragariza ingingo zimwe zakurikizwa mu gihe amakoraniro mu Kiliziya yaba asubukuwe nyuma y’iminsi mike hakomorewe gusezerana ariko harimo abantu batarenze 30.

Inama y’Abaminisitiri idasanzwe yateranye ku wa Kabiri tariki 16 Kamena 2020, yahaye icyizere insengero cyo kongera gufungura mu minsi 15 iri imbere, nyuma y’amezi atatu zidasengerwamo kubera ingamba zo kwirinda ikwirakwira ry’icyorezo cya Coronavirus.

Umwanzuro w’inama y’abaminisitiri uvuga ko “Insengero zizakomeza gufunga, abanyamadini barashishikarizwa gukomeza gushyiraho ingamba zo gukumira no kwirinda Covid-19, mu rwego rwo kwitegura kuba insengero zafungurwa mu minsi 15 iri imbere hashingiwe ku bizava mu isesengura ry’ubuzima”.

Magingo aya, Abasenyeri n’abayobozi b’amadini batangiye kwitegura uko bashyira mu bikorwa ingamba zo kurwanya Coronavirus, kugira ngo nibaramuka bakomorewe bazabe bariteguye ku buryo amasengesho azakorwa hanirindwa ikwirakwira ry’iki cyorezo,

Mu ibaruwa Musenyeri Rukamba yandikiye abapadiri ayoboye n’abakirisitu, yabamenyesheje ingingo 20 zazakurikizwa mu gihe leta yaba ikomoreye insengero nk’uko iheruka ku bitangaza.

IGIHE yamenye amakuru y’uko muri iki gihe hari kuba ibiganiro n’abakirisitu ku buryo basobanukirwa neza aya mabwiriza, ndetse hagatoranywa n’abazafasha abandi mu kuyumva no kuyakurikiza.

Muri izo ngingo, harimo ko ahasengerwa hagomba kuba hafite ibikoresho byose byifashishwa mu kwirinda ikwirakwira rya COVID-19 ; ndetse ko mu kwirinda ubucucike mu nsengero, abapadiri bagomba gutanga aho bazasengera muri paruwasi yabo, ubuso bwaho n’umubare w’abantu bashobora gusengeramo bakurikije ingano yaho.

Yakomeje ababwira ko abagiye gusenga bagomba kuzajya bambara agapfukamunwa igihe cyose kandi bagashyira intera ya metero ebyiri hagati y’umuntu n’undi.

Ati “Ibyo bizasaba kwerekana imyanya abantu bicaramo. Misa zizongerwa ku buryo abifuza kuzazijyamo bose bazabibonera uburyo ndetse misa zimwe zo mu mibyizi zikaba zasimbuza izo ku cyumweru.”

Ikindi ni uko mu kiliziya hagomba gushyirwa umuti wo gukaraba wica udukoko cyangwa se za kandagira ukarabe ku buryo abantu babona uko bakaraba intoki binjiye ndetse banasohotse mu kiliziya.

Yakomeje agira ati “Kubera ko guhazwa mu biganza bitemewe, uhaza azakoresha ikiyiko kandi yambare agapfukamunwa.”

Mu gihe cyo gutura, yavuze ko mu kiliziya hazaba hari ibiseke bine kugira ngo abantu badahura kandi bature vuba. Ati “Niho bazashyira amaturo y’amafaranga. Amaturo y’imyaka bazajya bayashyira ahantu bagende badakoze ku maturo basanze aho, nyuma Padiri ajye kuyaha umugisha, awuha n’abatuye.”

Muri aya mabwiriza harimo kandi ko umubare w’abaririmba (Chorale) uzagabanuka.

Imwe mu ngingo yakunze kwibazwaho cyane mu gihe Kiliziya n’insengero bizaba bikomorewe, ni ijyanye n’uburyo bwo kugabanya umubare w’abantu bajya gusenga ; Musenyeri Rukamba yanditse ko hazabaho kugena misa hakurikijwe imiryango remezo.

Ati “Umuyobozi w’Umuryango remezo azakora urutonde rw’abantu baje mu misa bo mu gace ke, agaragaza aho batuye na nimero zabo za telefoni.”

Ikindi ni uko ku bana, abemerewe kuzajya bajya mu misa ari abarengeje imyaka 12 kandi nabo bakajyayo baherekejwe n’ababyeyi.

Yakomeje avuga ko nta misa izajya irenza amasaha abiri, ndetse ko mbere y’uko indi itangira, hazajya habaho umwanya wo gusukura Kiliziya w’isaha imwe. Ku bapadiri n’abasomyi, bo ngo ntibazajya bambara udupfukamunwa ndetse ntibemerewe guhererekanya ibitabo n’indangururamajwi.

Abayoboke b’amadini bari bamaze amezi atatu batagera mu nsengero, bavuga ko bizeye ko isesengura ry’inzego z’ubuzima nta kabuza rizabemerera gusubira mu nzu z’Imana kuko ingamba abanyamadini bafashe zisobanutse.

Kayitare Jean Claude wo muri Paruwasi Gatolika ya Rutonde muri Arkidiyosezi ya Kigali, yavuze ko nubwo misa zakomeje binyuze kuri radiyo na televiziyo, yishimiye kuba insengero zigiye kongera gufungura.

Ati “Hari abantu usanga gusengera mu rugo bibagora kubera ibibarangaza. Kuba insengero zishobora kongera gufungurwa turabyishimiye cyane kandi turabishimira Imana”.

Kuva muri Werurwe iki cyorezo cyagaragara mu Rwanda, abanduye ni 787 mu gihe abamaze gukira ari 370 naho abakirwaye ni 415 mu gihe babiri aribo bitabye Imana. Hamaze gufatwa ibipimo 113 544.

Umushumba wa Diyosezi ya Butare, Musenyeri Philippe Rukamba, abategura ku ngamba zakurikizwa mu gihe Kiliziya zaba zikomorewe

Tanga igitekerezo